Saisteibā ar 17. oktobra nūtikšonom LR Saeimā gribim drusku vaira izstuosteit sovu redzīni. Kotrā gadīnī, ka nazkam nu profesionalim (juristi, volūdnīki) atsarass pamatuoti preciziejumi, ar prīcu tūs apsaviersim i nu sovys pusis raudzeisim sagataveit pretargumentus.

Suoksim ar vysim labi zynomū – Latvejis Satversme paradz, ka vaļsts volūda ir latvīšu volūda (a na "latvīšu literaruo volūda").

Deļtam vajadzeigs plašuoks skaidruojums itim obejim jiedzīnim i juoparuoda atškireibys tūs vydā. Izreiz juosoka – turim latvīšu volūdu par vīneigū Latvejis vaļsts volūdu, bet tuoļuok gribim atzeimēt, ka jai viesturiskai ir izaveiduojušs divejis literaruos tradicejis: latvīšu literaruo volūda (izveiduota iz vydsdialekta pamata) i Latgolys latvīšu voi latgalīšu literaruo volūda (volūdnīku terminologejā – izaveiduojuse iz augšzemnīku dialekta pamata). Taitod obejis divejis ir leidzvierteigys latvīšu volūdys sastuovdalis. Itaidu myusu redzīni styprynoj ari Vaļsts volūdys lykuma niulinejuo redakceja, kurā pasaceits, ka latgalīšu rokstu volūda ir viesturisks latvīšu volūdys paveids.